Isfiske på Urvatnet

Det har vel eigentleg blitt ein tradisjon. Isfiske på Urvatnet i påska. Tidlegare år har eg hatt med eit par kompisar, pappa, eller eg har reist heilt åleine. Alt har sin eigen sjarm. I år stilte vi mannsterke.

5 staute karar la i veg frå Sætre, etter at Jørn hadde skyssa oss eit stykke med traktor. Tunge sekkar og rotten snø er ein dårleg kombinasjon, så vi fekk verkeleg slite i motbakkane. Men med eit islagt fjellvatn som mål er det ingenting som held oss tilbake. Ein kjapp stopp på Hoemssetra for å hente isbor og ved, for så å fortsette mot vatnet. Tjukkelsen på isen er like spanande kvart år, spesielt i år etter ei lang periode med finever. Mens lavvoen var på veg opp, gjekk eit par mann ut på isen for å prøvebore. Ganske lite is i år, "berre" 85 cm :D Resultatet etter første kveld på isen var 4 fine kree.

Utover kvelden vart det stemning rundt bålet, med grilla laks, bakte poteter og rømme. Bålkjelen var i sving heile tida, så kaffe og noko godt attåt holdt oss varme ut i dei seine nattetimar, akkompagnert av ein fantastisk stjernehimmel.

Vi var nok litt bekymra for veret når vi våkna om morgonen, men etter ein kjapp gløtt ut av lavvoen kunne vi konstatere at dette skulle bli ein strålande dag!

Bålkjelen vart fort varm og frokosten vart fortært.

Ein strålande dag på isen, der enkelte av oss faktisk tassa rundt berre i stillongs og fjellsko, heilt fantastisk!! Fiske var også bra, med unntak av han som stilte med fiskeutstyret, som ikkje fekk ein einaste fiskepinne gjennom isen.

Etter kvart pakka vi saman lavvoen og ramla oss nedover mot sivilisasjonen igjen.

Det er eigentleg vanskeleg å setje ord på ein slik tur...det næraste eg kjem er fantastisk, heilt rått!! Gler meg allereie til neste påske!!